काठमाडौंको बिष्णुमती खोला किनारमा ठूलो परिमाणमा हतियार बरामद भएको छ। जिल्ला प्रहरी परिसर काठमाडौंका अनुसार आइतबार बिहान काठमाडौं महानगरपालिका–१५ शोभाभगवती क्षेत्रमा सरसफाइका क्रममा चार थान पेस्तोल, ५८ राउण्ड गोली र ७ थान म्यागजिन फेला परेका हुन्।
प्रहरी परिसरका एसएसपी रमेश थापाका अनुसार बरामद पेस्तोल टाइप–५४ प्रकारका रहेका छन्। त्यस्तै, घटनास्थलबाट ९ एमएम बेरेटा पेस्तोलमा प्रयोग हुने ५८ राउण्ड गोली समेत भेटिएको उनले जानकारी दिए।
महानगरपालिका र प्रहरीको संयुक्त सरसफाइ टोलीले खोला किनार सफा गर्ने क्रममा उक्त हतियार फेला पारेको हो। प्रारम्भिक अनुसन्धानमा ती हतियार जेनजी आन्दोलनका बेला प्रहरीबाट लुटिएका हुनसक्ने आशंका गरिएको छ।
