रुपन्देहीको भैरहवा र आसपासका क्षेत्रमा प्रहरीले अनलाइन सट्टेबाजी (अनलाइन जुवा) सञ्चालनमा संलग्न ठूलो नेटवर्कमाथि कडा कारबाही गरेको छ। विभिन्न स्थानबाट दुई दिनको विशेष अपरेसनमा २० जना पक्राउ परेका छन्, जसमा २ जना नेपाली र १८ जना भारतीय नागरिक रहेको प्रहरीले जनाएको छ।
जिल्ला प्रहरी कार्यालय तथा मातहतका युनिटहरूद्वारा सञ्चालन गरिएको समन्वित अभियानका क्रममा रुपन्देही जिल्ला अन्तर्गतका विभिन्न स्थानबाट उनीहरूलाई पक्राउ गरिएको हो। पक्राउ पर्ने समूहले अनलाइन बेटिङमार्फत अवैध कारोबार सञ्चालन गर्दै आएको प्रारम्भिक अनुसन्धानमा खुलेको छ।
आइतबार तिलोत्तमा नगरपालिका–७ क्षेत्रबाट मात्रै ९ जनालाई नियन्त्रणमा लिइएको थियो। त्यसअघि चैत २७ गते तिलोत्तमा–१५ कोटिहवा क्षेत्रबाट थप ११ जनालाई पक्राउ गरिएको प्रहरीले जनाएको छ।
प्रहरीका अनुसार पक्राउ परेकाहरूको साथबाट ठूलो परिमाणमा डिजिटल तथा वित्तीय सामग्री बरामद गरिएको छ। जसमा ल्यापटप, मोबाइल फोन, बैंक चेकबुक, एटीएम कार्ड, पेनड्राइभ, र विभिन्न कागजातहरू फेला परेका छन्। साथै नेपाली तथा भारतीय नगद पनि बरामद गरिएको छ, जसले संगठित वित्तीय कारोबारको संकेत गरेको अनुसन्धान अधिकारीहरूको भनाइ छ।
प्रारम्भिक अनुसन्धानले यो समूहले सीमापार नेटवर्कमार्फत अनलाइन बेटिङ सञ्चालन गर्दै रकमको लेनदेन गर्दै आएको देखाएको छ। पक्राउ परेकाहरूमाथि थप अनुसन्धान भइरहेको जिल्ला प्रहरी कार्यालय रुपन्देहीले जनाएको छ।
