नेपाल पत्रकार महासंघ रुपन्देहीले स्थापना गरेको उत्कृष्ट खेलकुद पत्रकारिता पुरस्कार पत्रकार सुमन अधिकारीलाई प्रदान गरिएको छ।
महासंघको ७१औं स्थापना दिवसको अवसर पारेर आयोजित कार्यक्रममा अधिकारीलाई नगद २५ हजार रुपैयाँसहित सम्मान गरिएको हो। जिल्लामा रहेर लामो समयदेखि खेलकुद पत्रकारितामा सक्रिय भूमिका निर्वाह गर्दै उल्लेखनीय योगदान पुर्याएको कदरस्वरूप उनलाई उक्त पुरस्कार प्रदान गरिएको महासंघले जनाएको छ।
कार्यक्रममा बोल्दै महासंघका पदाधिकारीहरूले खेलकुद क्षेत्रको विकासमा पत्रकारिताको महत्वपूर्ण भूमिका रहने उल्लेख गर्दै यस क्षेत्रमा क्रियाशील पत्रकारहरूको हौसला बढाउन पुरस्कार स्थापना गरिएको बताए।
उक्त अवसरमा विभिन्न क्षेत्रका व्यक्तित्वहरूको उपस्थिति रहेको थियो भने पुरस्कारले जिल्लास्तरमा खेलकुद पत्रकारितालाई थप ऊर्जा र प्रेरणा दिने विश्वास व्यक्त गरिएको छ।
