आगामि फागुुन २१ गते हुुन गईरहेको प्रतिनिधि सभा सदस्य पदको निर्वाचनकोलागि उम्मेदवारी दिएकाहरु यतिबेला घरदैलो गरिरहेका छन् । यो प्रतिनिधीसभा निर्वाचनको सन्दर्भमा उम्मेदवारहरु सबै मतादातालाई भेट्न पनि सक्दैनन । किनकी समय थोरै छ, मतादाता धेरै छन् । यसैले सञ्चार माध्ययमको दायित्व बुझेर उम्मेदवारहरुको मुुख्य चुुनाबी कार्यक्रम सहितको कुराहरु समेटेर नेपाल वर्ड डटकमले उम्मेदवारसँग ५ प्रश्न निर्वाचन विशेष स्तम्भ शुरु गरेको छ । हाम्रो यो स्तम्भ सञ्चालन गर्नुको मुुख्य उद्धेश्य उम्मेदवारहरुको कार्यक्रमलाई मतादाता समक्ष पुराउने हो । निर्वाचन विशेषको सो स्तम्भकोलागि रुपन्देही क्षेत्र नम्बर ३ मा नेकपाका तर्फबाट उम्मेदवार रहेका उम्मेदवार फैज अहमद खानसँग हाम्रा सहकर्मि अस्मिता अधिकारी र मनोज क्षेत्रीले गरेको कुराकानिको सम्पादित अंशः
नेपाल वर्ड डटकममा तपाईंलाई, स्वागत छ । घरदैलोको क्रममा हुनुहुन्छ, मतदाताबाट कस्तो प्रतिक्रिया पाइरहनुभएको छ ?
यतिबेला म रुपन्देही क्षेत्र नम्बर ३ का विभिन्न गाउँ टोलमा घरदैलो कार्यक्रममा छु। मतदाताहरूबाट अत्यन्त सकारात्मक र उत्साहजनक प्रतिक्रिया पाइरहेको छु। जनतामा परिवर्तनको चाहना स्पष्ट देखिन्छ। विशेषगरी युवा पुस्ता, महिला दिदीबहिनी, किसान, व्यवसायी र मजदुर वर्गले अहिलेको अवस्थाप्रति असन्तुष्टि व्यक्त गर्दै अब काम गर्ने, परिणाम दिने नेतृत्व चाहिएको बताउनुभएको छ। उहाँहरूले रोजगारी सिर्जना, सुशासन, भ्रष्टाचार नियन्त्रण र स्थानीय पूर्वाधार विकासलाई प्राथमिकतामा राख्न आग्रह गर्नुभएको छ।
मतदाताहरूले अहिले सबैभन्दा बढी उठाउने विषय भनेको विकासका ठूला आयोजना अधुरा रहनु र भएका संरचनाहरू पनि प्रभावकारी रूपमा सञ्चालन नहुनु हो। खासगरी गौतम बुद्ध अन्तर्राष्ट्रिय विमानस्थल पूर्ण रूपमा सञ्चालनमा नआएको विषयमा उहाँहरूको गुनासो छ। विमानस्थल राम्रोसँग सञ्चालन हुन नसक्दा यहाँका होटल, यातायात, पर्यटन र साना उद्योग व्यवसायमा प्रत्यक्ष असर परेको छ। त्यसैले मैले घरदैलोका क्रममा यही विषयलाई मुख्य एजेन्डाका रूपमा उठाएको छु।
जनताले नेकपालाई नै किन रोज्ने? के छ त्यस्तो परिवर्तनको एजेन्डा ?
हाम्रो पार्टी नेपाल कम्युनिष्ट पार्टी ले नेपालको राजनीतिक रूपान्तरणमा महत्वपूर्ण भूमिका खेलेको छ। एकात्मक शासन व्यवस्थाबाट संघीय लोकतान्त्रिक गणतन्त्रसम्मको यात्रामा पार्टी अग्रपंक्तिमा उभिएको इतिहास छ। परिवर्तनका हरेक आन्दोलनमा हाम्रो योगदान रहेको छ। हामीले सधैं राष्ट्रिय स्वाभिमान, सामाजिक न्याय र समानताको पक्षमा आवाज उठाएका छौँ।
भ्रष्टाचार विरुद्धको अभियानमा पनि हाम्रो पार्टी सधैं स्पष्ट अडानमा रहेको छ। हामीले राज्यका संरचनाहरूलाई पारदर्शी र जवाफदेही बनाउनुपर्ने कुरामा जोड दिँदै आएका छौँ। विशेषगरी पिछडिएको वर्ग, दलित, सिमान्तकृत समुदाय र अल्पसंख्यकहरूको अधिकार सुनिश्चित गर्नका लागि कानुनी र नीतिगत पहल गरेका छौँ। आगामी दिनमा पनि यी समुदायलाई राज्यको मूलधारमा स्थापित गर्ने हाम्रो स्पष्ट प्रतिबद्धता छ।
तपाईँले जित्ने मुख्य आधार र जनतालाई सुनाइरहेका मुख्य एजेन्डाहरू के–के हुन?
मेरो मुख्य चुनावी एजेन्डा भनेको गौतम बुद्ध अन्तर्राष्ट्रिय विमानस्थललाई पूर्ण रूपमा, नियमित र प्रभावकारी ढंगले सञ्चालनमा ल्याउनु हो। विमानस्थल सञ्चालनमा आएपछि रुपन्देही मात्र होइन, सिंगो लुम्बिनी प्रदेशको आर्थिक गतिविधिमा ठूलो टेवा पुग्नेछ। यो विमानस्थल बुद्ध सर्किटसँग जोडिएको छ, जसले धार्मिक पर्यटनलाई अन्तर्राष्ट्रिय स्तरमा विस्तार गर्न सक्छ।
लुम्बिनी विश्वभरका बौद्ध धर्मावलम्बीहरूको आस्थाको केन्द्र हो। यदि विमानस्थल प्रभावकारी रूपमा सञ्चालन भयो भने लुम्बिनी आउने पर्यटकको संख्या उल्लेखनीय रूपमा बढ्नेछ। यसले होटल व्यवसाय, यातायात, हस्तकला, कृषि उत्पादन र सेवा क्षेत्रमा हजारौं रोजगारी सिर्जना गर्नेछ। अहिले धेरै युवा विदेश पलायन भइरहेका छन्। हामीले यहाँ नै अवसर सिर्जना गर्न सक्यौं भने युवाहरू आफ्नै भूमिमा काम गर्न सक्नेछन्।
त्यसैगरी, क्षेत्र नम्बर ३ भित्रका सडक सञ्जाल सुधार, सिँचाइ सुविधा विस्तार, कृषि आधुनिकीकरण, प्राविधिक शिक्षा र स्वास्थ्य सेवाको पहुँच बढाउने योजना पनि मेरो प्राथमिकतामा छन्। विकासको लाभ गाउँ
गाउँसम्म पुर्याउने लक्ष्यसहित म अघि बढिरहेको छु।
मेरो जितको मुख्य आधार भनेको मेरो सामाजिक संलग्नता र विगतको अनुभव हो। म लामो समयदेखि सामाजिक क्षेत्रमा सक्रिय छु। विद्यालय व्यवस्थापन समितिको अध्यक्ष भएर मैले शिक्षा क्षेत्रमा काम गरेको छु। विद्यालयको भौतिक संरचना सुधार, शिक्षक व्यवस्थापन र गुणस्तरीय शिक्षाका लागि पहल गरेको अनुभव मसँग छ। त्यसैले शिक्षा क्षेत्रका अभिभावक र युवाहरूले मलाई सकारात्मक रूपमा हेर्नुभएको छ।
विगतका प्रतिनिधिहरूले अपेक्षा अनुसार काम नगरेकाले जनतामा निराशा छ। अधुरा योजना, अपूर्ण प्रतिबद्धता र परिणामविहीन राजनीति देखेर जनता अब विकल्प खोजिरहनुभएको छ। उहाँहरू अब बोल्ने होइन, काम गर्ने नेतृत्व चाहनुहुन्छ। मैले घरदैलोमा स्पष्ट रूपमा भनेको छु म ठूलो भाषणभन्दा पनि सानो तर परिणाममुखी काममा विश्वास गर्छु।
म मतदाताहरूलाई पार्टीभन्दा माथि उठेर उम्मेदवारको क्षमता, इमान्दारिता र काम गर्ने शैली हेरेर निर्णय गर्न आग्रह गर्छु। लोकतन्त्रमा अन्ततः जिम्मेवारी व्यक्ति विशेषले नै वहन गर्छ। त्यसैले योग्य, सक्षम र जनतासँग जोडिएको उम्मेदवार छान्नु आजको आवश्यकता हो।
अहिले राजनीतिप्रति सबै निराश देखिन्छन्। उनीहरूलाई तपाईं कसरी आश्वस्त पार्नुहुन्छ ?
सबैको निराशा स्वाभाविक छ। विशेष युवाको , रोजगारीको अभाव, अवसरको कमी र नेतृत्वमा पारदर्शिताको अभावले गर्दा उनीहरू राजनीतिबाट टाढिन खोजिरहेका छन्। तर म युवाहरूलाई भन्न चाहन्छु राजनीति परिवर्तनको माध्यम हो, समस्या होइन। यदि असल मानिस राजनीतिमा नआए, खराब अभ्यास झन् मजबुत हुन्छ।
म युवा उद्यमशीलता प्रवर्द्धन, सीपमूलक तालिम, स्टार्टअप प्रोत्साहन र स्थानीय उद्योगलाई सहुलियत दिने नीति ल्याउने पक्षमा छु। युवाहरूलाई केवल नारामा होइन, निर्णय प्रक्रियामा सहभागी गराउनुपर्छ भन्ने मेरो विश्वास छ। पार्टीभित्र पनि युवाहरूलाई नेतृत्वमा ल्याउने र जिम्मेवारी दिने वातावरण बनाउन म प्रतिबद्ध छु।
जनतालाई के सन्देश दिन चाहनुहुन्छ ? र तपाईंको मुख्य प्रतिस्पर्धी को हो ?
रुपन्देही क्षेत्र नम्बर ३ का सम्पूर्ण मतदातामा मेरो विनम्र अनुरोध छ यो निर्वाचन केवल प्रतिनिधि छान्ने प्रक्रिया मात्र होइन, हाम्रो क्षेत्रको भविष्य निर्धारण गर्ने अवसर हो। विकास, रोजगारी, सुशासन र समानताको मार्ग रोज्ने कि यथास्थितिमा बस्ने भन्ने निर्णय तपाईंहरूको हातमा छ।
म तपाईंहरूको विश्वासलाई कहिल्यै धोका नदिने प्रतिबद्धता व्यक्त गर्दछु। तपाईंहरूले साथ दिनुभयो भने क्षेत्र नम्बर ३ लाई आर्थिक, शैक्षिक र सामाजिक रूपमा उदाहरणीय क्षेत्र बनाउने प्रयासमा म दिनरात खटिनेछु।
मलाई मेरो प्रतिस्पर्धी यो नै हो भन्ने लाग्दैन किनभने सबै आफ्नो ठाउँबाट ठिक हुन्छ, यो कुरा जनतालेनै विचार गर्ने कुरा हो धन्यवाद ।
