पुनहरि बेल्बासे, रूपन्देही
रूपन्देही निर्वाचन क्षेत्र नम्बर २ बाट नेपाली कांग्रेसका उम्मेदवार चुन्नप्रसाद पौडेलले घरदैलो अभियानलाई तीव्रता दिएका छन्। स्वदेशमै रोजगारी सिर्जना गर्ने मुख्य एजेन्डासहित चुनावी प्रतिस्पर्धामा रहेका पौडेलले युवालाई देशभित्रै अवसर उपलब्ध गराउने प्रतिबद्धता दोहोर्याएका छन्।
शनिबार बुटवलको नयाँ गाउँ क्षेत्रमा आयोजित घरदैलो कार्यक्रममा उनले घर–घर पुगेर मतदातासँग प्रत्यक्ष संवाद गरे। उनले रोजगारी अभावका कारण युवाहरू वैदेशिक रोजगारीमा जान बाध्य भएको अवस्था अन्त्य गर्न उत्पादन, उद्योग र उद्यमशीलता प्रवर्द्धन आवश्यक रहेको बताए। कृषि आधुनिकीकरण, साना तथा मझौला उद्योग स्थापना, सीपमूलक तालिम केन्द्र विस्तार र स्थानीय स्रोत–साधनको उपयोगमार्फत दीर्घकालीन रोजगारी सिर्जना गर्ने योजना उनले प्रस्तुत गरे।
घरदैलोका क्रममा स्थानीय बासिन्दाहरूले पनि आफ्ना धारणा राखेका थिए। नयाँ गाउँका एक स्थानीय युवाले यसपटक रोजगारीको स्पष्ट योजना बोकेका उम्मेदवारलाई समर्थन गर्ने मनस्थिति बनेको बताए। अर्का एक व्यवसायीले क्षेत्रको आर्थिक गतिविधि चलायमान बनाउन उद्योगमैत्री वातावरण आवश्यक रहेको उल्लेख गरे। एक महिला मतदाताले युवाहरू विदेश पलायन हुनुपर्ने बाध्यता अन्त्य गर्न सक्ने नेतृत्व चाहिएको धारणा राखिन्।
अभियानका क्रममा स्थानीयको उत्साहजनक सहभागिता देखिएको थियो। कतिपय मतदाताले पुराना अनुहारभन्दा नयाँ सोच र स्पष्ट कार्ययोजना बोकेका उम्मेदवारप्रति आकर्षण बढेको प्रतिक्रिया दिएका छन्।
पौडेलले आगामी दिनमा क्षेत्रका अन्य टोल तथा वडामा पनि घरदैलो अभियानलाई निरन्तरता दिने बताएका छन्। चुनाव नजिकिँदै जाँदा क्षेत्र नम्बर २ मा चुनावी माहोल थप सक्रिय बन्दै गएको छ, र रोजगारीको मुद्दा प्रमुख बहसको विषय बन्न थालेको छ।
