काठमाडौँ १८। निर्वाचन आयोगले तोकिएको कार्यतालिका अनुसार आसन्न प्रतिनिधिसभा निर्वाचनको तयारीलाई तीव्र गतिमा अघि बढाएको छ। आइतबार काठमाडौँमा आयोजित पत्रकार सम्मेलनमा आयोगका प्रवक्ता नारायणप्रसाद भट्टराईले पछिल्लो साता मतपत्र र मतदाता नामावली छपाइलाई मुख्य प्राथमिकतामा राखेर काम भएको जानकारी दिए।
आयोगका अनुसार समानुपातिकतर्फको मतपत्र छपाइ यसअघि नै सम्पन्न भइसकेको छ भने प्रत्यक्षतर्फ अहिलेसम्म २५ जिल्लाका लागि ३० लाख मतपत्र छाप्ने काम सकिएको छ। अहिले दैनिक १२ देखि १५ लाखको सङ्ख्यामा मतपत्र छपाइ भइरहेको र बाँकी जिल्लाको काम पनि छिट्टै सकिने आयोगको दाबी छ। त्यस्तै, मतदाता नामावली छपाइको काम अन्तिम चरणमा पुगेको र आउने हप्तासम्म सबै नामावली तयार भइसक्ने प्रवक्ता भट्टराईले बताए।
निर्वाचन आचारसंहिता पालना गराउन आयोग सक्रिय रहेको र उल्लङ्घन गर्ने व्यक्ति तथा संस्थालाई स्पष्टीकरण सोध्ने कार्य भइरहेको उनले जानकारी दिए। मतदातालाई मतदान प्रक्रियाबारे जानकारी दिन छिट्टै मतदाता शिक्षा कार्यक्रम सुरु गर्ने आयोगको योजना छ।
